Patay ang usa ka e-bike driver human nga gibanggaan sa usa ka land cruiser kaganihang pasado alas 2 sa kadlawon sa R. Castillo Street, Agdao ning dakbayan.
Giilang si Hermilo Sarin Dayagro ang biktima, 39-anyos, residente sa IKP Alterado, R.Castillo Agdao.
Samtang, angol usab ang mga pasahero niini nga sila Keye Therese Monterde, 24-anyos ug Vince Mejasco usa ka 21-anyos.
Gibutyag usab sa Traffic Enforcement Unit sa Davao City Police Office nga ang driver sa land cruiser giilang si alyas “Chen” usa ka 23-anyos.
Gani, sa kuha sa CCTV footage, miliko paingon sa Holy Cross drive ang e-bike sakay ang duha ka mag-uyab nga pasahero niini, rason nga nabanggaan kini sa land cruiser.
Gumikan sa gikusugon sa pagkabangga, nahiwi ang poste sa central island.
Sa eksklusibong pakighinabi sa Bombo Radyo Davao kang PSMS Lowell Galupe nga human error ang nakitang rason sa maong insidente.
Sa kasamtangan, anaa na sa kwerpo sa kapulisan ang maong suspek, ug anaa na usab sa kustodiya niini ang land cruiser.
