Tingkagol sa bilangguan sa Tugbok PNP ang usa ka hamtong nga lalaki nga pinangita sa balaod gumikan sa 40 ka ihap nga kasong lugos.
Subay sa report sa kapulisan, nadakpan ang usa ka 28-anyos nga si alyas Roel pinasikad sa warrant of arrest nga gipagula sa korte tungod sa kasong Qualified Rape batok sa usa ka minor de edad.
Gidakop ang nahisgutan sa Barangay Sto. Nino, Tugbok, ning syudad gumikan na usab sa impormasyon nga nahipos sa mga otoridad.
Nasayran nga sa miaging tuig pa ginapangita ang maong indibidwal human nga gipaguwa ang arrest order batok sa suspetsado.
Samtang subay sa nakalatid sa Warrant of Arrest, walay girekomenda nga pyansa ang korte tungod sa maong kaso.
Sa pagkakaron, ginahulat na lamang sa kapulisan ang kamanduan sa korte alang sa pagbalhin sa suspetsado sa City Jail sa Maa ning syudad sa Davao.
