Gibutyag sa kapolisan nga ‘Negatibo’ sa illegal nga droga ug uban pang “drug-induced” nga mga substansiya ang anak kinsa mipatay sa iyang kaugalingong amahan pinaagi sa pagputol sa ulo ug paghabwa sa lamang-loob niini sa Purok 1A-Gapas, Barangay Madaum, Tagum City.
Sukwahi kini sa mga espekulasyon ug hungihong nga nagakatag sa online.
Gikompirma ni Tagum Police Station chief Police Colonel Wildemar Tiu, nga ang suspetsado gipailawom gilayon og screening process human sa pagka-aresto niini.
Kini nga pamaagi ginahimo aron nga madeterminar kung ilegal nga druga ba ang hinungdan nga nagtukmod niini nga himuon ang krimen o ang insidente ba nahitabo gumikan sa kasuko.
Gipaklaro usab ni Tiu nga subay sa gihimong imbestigasyon, ilang usab narekober ang nagkadaiyang lamang-loob ug uban pang bahin sa lawas sa 60-anyos nga lalakeng biktima.
Kini human nga giangkon sa suspetsado nga adunay naghunghong kaniya nga patyon ang iyang amahan, hinungdan nga gikuha niini ang iyang mga ‘internal organs’ ug ulo dayun nga gilabay sa suba.
Apan gikompirma ni Tiu nga kadaghanan sa mga bahin sa lawas nakita nga anaa ra sa kakahoyan ug punongan nga nahimutang duol sa nahitaboan.
Sumala pa niini nga, pipila ka bahin sa lawas na usab ang ilang narekober, susama sa maskara, utok, nawong, ilong ug dunggan.
Dugang pa niini, nga gibuak gyud sumala pa sa suspetsado ang tibuok ulo sa biktima dayun nga gilabay ang ubang bahin sa fish pond.
Kasamtangan, ang suspetsado wala pa mapailawom sa psychiatric evaluation aron susihon ang kondisyon sa ‘mental health’ niini ug imbestigahan kung ang pagpatay aduna bay kalambigitan sa estado sa iyang panghunahuna.
