Gipalawman pa sa mga otoridad ang nahitabong pagpatay sa usa ka 50-anyos nga lalaki human gipusil sa wala mailhing suspetsado pasado alas Otso kagabii sa Purok 1, Barayco, Brgy.5-A, Bankerohan ning dakbayan sa Davao.
Giila sa kapulisan sa San Pedro ang biktima nga si Marli Masocol, usa ka mechanic, lumad nga residente sa Sta. Maria, Davao Occidental ug kini ang kasamtangang nagpuyo sa iyahang gi-trabahuan sa Tupaz St., Gem Village Barangay Maa.
Sa karon ginasuta sa mga otoridad ang mga naka-install nga CCTV sa palibot sa nahitabuan alang dugang imbistigasyon.
Ginasubay na usab sa kapulisan ang kabahin sa trabaho sa biktima isip usa ka mekaniko.
Subay sa report sa mga otoridad, samtang nagmaneho ang biktima sa usa ka pick-up nga color silver kalit kining giduol sa usa ka lalaki ug gipusil sa ulo nga bahin.
Human sa maong panghitabo yano ra usab nga naglakaw ang suspetsado palayo sa lugar nga naka-suot og swearshirt ug pula nga short pants.
Gidala pa ang biktima sa Southern Philippines Medical Center (SPMC) apan gideklara kini nga dead on arrival. Narekober sa crime scene ang basyo sa bala nga iya sa punto kwarentay singko nga pistola.
