Gituok ug gidunggab sa kawatan hangtod sa makabsan og kinabuhi ang usa ka 84 anyos nga lola nga gikatahong bed ridden gumikan sa stroke samtang nagpahulay sulod sa ilang balay sa Floridablanca, Pampanga.
Sa nahimong resulta sa imbestigasyon sa kapulisan, misulod ang 26 anyos nga suspek nga giilang si Alex Banez sa panimalay sa biktima aron mangawat ug human sa pagbuhat sa maong krimen, sa dihang pagawas na matud pa ang suspek, nakita matud pa niini ang biktima nga naghigda ug sa way pagduha-duha, giduol niini ang tiguwang ug gihilabtan kon nagpagawas sa kainit sa iyang lawas.
Gani, wala pa nakontento ang suspek, gidunggab pa niini ang biktima sa ikaduhang higayon nga maoy nahimong hinungdan sa hinanaling kamatayon niini.
Hinoon, nakorner ang suspek sa mga kaubanan sa biktima sa panimalay ug nasikop.
Miangkon ang suspek nga hubog kini sa dihang gibuhat ang krimen ug anaa usab siya sa impluwensya sa gigamit nga iligal nga droga.
Nakumpiska sa otoridad ang duha ka mga selpon ug pitaka, diin nakuha usab ang nagkadugong kutsilyo nga gigamit sa suspek sa pagpanunggab-patay sa biktima.
Sa karon, balhog na sa prisohan ang suspetsado ug mag-atubang og kasong robbery ug rape with homicide.
