Padayon gihapon ang nahimong inisyatiba ug pagpaningkamot sa Davao City Social Welfare and Development Office (CSWDO), aron nga palig-onon pa niini ang ilahang padayon nga ginapatuman nga Anti-Mendicancy Campaign.
Gipakusgan sa ahensya ang maong kampanya, pinaagi og paghatag og mga pamphlets ngadto sa mga Dabawenyos ug alang sab ngadto sa mga pipila ka mga establisyemento dinhi sa syudad.
Gitataw sab ni Mark Timbang, ang tigpamaba sa Children and Youth Welfare Program sa CSWDO, nga padayon gihapon matud pa ang ilahang pagpaningkamot aron nga mapakgang na kining mga indibidwal nga nagapanglimos ngadto sa mga nagkadaiyang bahin dinhi sa dakbayan, hilabi na nga adunay mga bata ang nalambigit sa maong binuhatan.
Kahinumdumang, nahimong hingpit na nga balaod ang Anti-Mendicancy Law kon PD No. 1563, diin maoy nagtumong nga pagkagangon na ang pagpalimos sa mga indibidwal ngadto sa mga kadalanan gumikana makahatag sumala pa kini og risgo sa kaluwasan ngadto sa ilahang mga tagsa-tagsa ka mga kinabuhi.
Subay sab sa maong balaod, nga og ugaling adunay masakpan nga nagapanglimos, mamahimong pahamtangan kini og multa nga P1,000 og mapriso gikan sa usa hangtod upat ka tuig nga pagka priso.
Alang sab ngadto sa mga tawo nga nagahatag og limos, mamahimo sab kining makaangkon og susamang silot nga maoy nakalatid sa balaod.
Giawhag na lamang niini ang mga indibidwal nga og buot niining muhatag og tabang ngadto sa mga pobre, mamahimo kini nilang ipaagi sa mga charity ug foundation ang ilahang mga donasyon, inay nga hatagan ang mga manlilimos nga anaa lamang ga laroy-laroy sa kadalanan.
