Gibutyag ni Atty. Archie Albao, ang Regional Director sa National Bureau of Investigation XI, nga mga bag-o sumala pa ang mga nadakpan nga nalambigit sa girondang POGO sa Panabo City, diin gituohan kining gikan matud pa kini sa Manila, ug mibalhin kini sa Panabo, aron nga mapadayon kini sa ilahang iligal nga negosyo.
Dugang pa ni Albao, nga laraw kini nilang pasakahan og kaso ang mga dinakpan kung ugaling adunay makita ngadto sa ilahang mga computer ug mga cellphones, nga padayon gihapong nagapang-scam, lakip na usab nga pasakahan kini og kaso ilawom sa balaod gumikan nga ginadili na sab karun nga mag-operate ang POGO sa nasud.
Kagahapon sa buntag, gipresenta sa NBI-11 ang dul-an 60 ka mga giingong POGO workers human nga gidakop sa Panabo City gumikan sa iligal nga POGO operation.
Sa kainatibuk-an adunay 55 ka mga Chinese Nationals sa 59 nga ihap samtang adunay duha ka Malayians ug usa ka Pilipina.
Nasayran nga nag-operate sumala pa ang mga nahisgutan sa Malitbog, Brgy. Manay, Panabo City nga gituohan sa otoridad nga adunay nagpaluyo nga mga opisyal sa ilahang iligal nga binuhatan.
Sa karon nagpadayon pa gihapon ang gihimong lawom nga imbistigasyon sa taga NBI labot sa nasampit nga operasyon.
