Gipaklaro ni kanhi House Speaker ug karon Davao del Norte 1st District Rep. Pantaleon Alvarez, nga angay pang makadagan og pagkapangulo si kanhi Pangulong Rodrigo Duterte alang sa 2028 Presidential Election, kana subay sa nakalatid sa konstitusyon.
Sigon pa ni Alvarez nga ang ginabawal lamang sa 1987 Constitution mao ang pag-reelect sa kasamtangang nakalingkod pa nga Pangulo sa nasud, diin aron malikayan matud pa ang nahitabo kaniadto sa panahon ni kanhi Pangulong Marcos Sr. nga milungtad kini og halos duha ka dekada nga milingkod sa Malakanyang isip pagkapangulo.
Dugang pa sa maong kanhing House Speaker, nga wala matud pay epekto ang maong balaod ngadto kang FPRRD gumikan dili kini incumbent sa pagkapangulo sa nasud.
Gitataw sab ni Alvarez nga sulod sa hapit 13 ka oras nga pag-atubang ni Duterte sa Quad Comm Hearing niadtong nakalabayng mga semana, makita niini nga anaa matud pa sa lagsik nga panglawas si Duterte ug aduna matud pa kini katakos nga mudumula pa og nasud.
