Hilabihan ang kalagot ni Sen. Ronald ‘Bato’ Dela Rosa human nga gibutyag ni Cong. Dan Fernandez, representative sa distrito sa Santa Rosa nga duna matud pay ‘babysitter’ ang iyang anak sulod sa Philippine National Police Academy samtang kini nagtuon.
Atol sa press conference nga gipahigayon niadtong adlawng Miyerkules, Oktobre 23 ning tuiga, gipagawas ni Sen. Dela Rosa ang iyang kasuko ug kahiubos batok kang Fernandez.
Wa sab malikayan ni Dela Rosa nga ipost ang iyang gibati sa iyang social media account.
Ang post niini dunay caption nga, ‘Cong. Fernandez, huwag mong idamay ang anak ko!
If your son needs a babysitter, mine doesn’t need one.’
Dugang pa niini nga misulod matud pa ang iyang anak sa PNPA nga wala sila mipabor.
Gipasigarbo sab niini nga ang iyang anak usa na ka ranger, airborne ug special forces student.
Mihangyo sab kini nga dili maliiton ang ilang propesyon.
Mihangyo sab kini sa mga politikong wala matud pa nakasulay bisan usa kaadlaw nga mahimong kabahin sa PMA, PNPA o bisan unsang training center ang wala matud pay katungod nga maliiton ang ilang trabaho.
Gani, midemand kini og respeto gikan sa mga politikong wala matud pa miagi og drugtest.
