Mipailawom si Davao City 1st District Representative Paolo Pulong Duterte og hair-follicle drug test, kagahapong adlawa sa Mandaluyong City, subay kana sa hagit na usab sa iyahang igsuon nga si VP Sara Duterte alang sa mga mukandidato isip pagka-kongresista karung umalabot nga 2025 midterm-election.
Nasayran nga anaa na kini sa ikatulong higayon nga nagpailawom kini sa Hair-Follicle Drug test, una kini kaniadtong gihagit matud pa kini ni Trillanes, ang ikaduha mao ang sabay sa pagduso sa usa ka balaudnon nga i-require ang tanang kongresista nga magpa drugtest ug ikatulo kagahapong adlawa.
Dugang sab ni Pulong nga dili lamang matud pa Drug test ang basehan aron iboto ang usa ka kandidato, lakip sab matud pa lantawon ang kapasidad niini nga mangulo sa usa ka dapit.
Lakip sab sa gibutyag ni Pulong nga dili matud pa niya ginaisip nga suod nga mga higala ang mga Nograles gumikan kaniadto pa kini gina-tawag nga Drug addict sa amahan sa mga Nograles nga si kanhi House Speaker Prospero Boy Nograles.
Samtang, nagpa drug-test sab sa Davao City ang kaatbang ni Congressman Pulong isip pagka-representante sa 1st District sa Davao City nga si PBA Representative Migs Nograles, kana human nga gihagit kini ni Pulong nga kinahanglan matud pa nga magpa drug-test usab ang iyahang kaatbang.
Gikanayon sab ni Migs Nograles nga gibuhat lamang matud pa kini niya, dili aron sa pagtubag sa maong hagit, apan mao ang pagpamatuod sa iyahang kaugalingon nga limpyo kining muatubang ngadto sa mga katawhan nga iyahang serbisyohan.
