Gibasura sa korte ang hangyo nga house o hospital arrest ngadto kang Kingdom of Jesus Christ Leader Pastor Apollo Quiboloy.
Sumala pa sa pamahayag ni Atty. Israelito Torreon, ang legal counsel sa KOJC nga nakadawat sumala pa sila og order gikan sa Pasig Regional Trial Court (RTC) Branch 159 nga gibasura matud pa ang ilahang petisyon nga ipailawom sa house o hospital arrest ang maong Pastor.
Dugang pa niini nga laraw karun sa ilahang kampo nga muduso og motion for reconsideration ug galaum pa sa gihapon sumala pa sila nga mahatagan og higayon ang ilahang hangyo karun ngadto sa korte.
Gani, wala sab gi detalye ni Torreon ang hinungdan og nganong gibasura kini sa korte ang ilahang request.
Kahinumdumang una nang miduso og mosyon ang kampo ni Pastor Quiboloy nga angay matud pa kining ipa hospital arrest gumikan sa pangedaron niini ug aduna sab matud pa existing condition sa bahin sa panglawas sa maong Pastor.
Sa karun, anaa gihapon nagpabilin si Pastor Quiboloy sa detention facility sa Camp Crame, samtang ginataral pa sa korte ang iyahang mga kaso.
