Gianunsiyo sa Hugpong ng Tawong Lungsod Party nga hingpit na nilang gitanggal isip miyembro sa ilang partido sila Councilor Wilberto al-ag, Bernard Al-ag,Punong Barangay Lilibeth Al-ag ug Bernadette Al-ag gumikan matud pa sa aktibong pagsuporta sa Tingog Partylist nga usa matud pa ka political entity.
Gani, ang suportang ginapakita sa pamilyang Al-ag sa naasoy nga partido usa ka dakong sayop ug usa ka matang sa pagpangluib sa balaod ug prinsipyo sa partido.
Ang maong lakang gidesisyunan matud pa pag-ayo sa partido human ang tumang deliberasyon ug nahisubay matud pa ki ni sa Art. 7 sa Party Disciple and Loss of Membership diin sa Sec. 6, gipunting nga ang pagtabang sa laing partido o indibidwal man nga di kabahin sa Hugpong gumikan sa politikanhong tumong nga way pagpananghid usa ka dakong kalapasan.
Ang HTL hingpit matud pa nga ginasuportahan ang Pwersa ng Pilipinong Pandaragat (PPP) nga usa ka organisasyon dunay susamang tumong alang sa kalambuan matud pa sa siyudad ug sa katawhang Pilipino.
Nasabtan matud pa sa partido nga ang maong lakang makamugna og daghang istorya sa katilingban, apan ang integridad sa partido ug ang prinsipyo maoy ilang barugan.
Samtang, subling giawhag ni Davao City Mayor Sebastian ‘Baste’ Duterte ang tanang miyembro sa HTL nga magpabiling musalig sa panglantaw sa partido samtang nagpadayon matud pa silang nagtambayayong sa paghatod og serbisyo sa Davao City.
