Dako ang pagtoo sa Kingdom of Jesus Christ (KOJC) members nga si Pangulong Ferdinand “Bongbong” Marcos Jr. ang nagpaluyo sa mga kamandoan ug aksyon sa mga kapulisan gawas sa ilang compound aron gilayong makita ug madakpan si Pastor Apollo Quiboloy.
Kini human sa namatikdang mas daghanang aksyon sa mga kapulisan karong panahona bisan paman sa selebrasyon sa Kadawayan Festival. Matud pa sa mga myembro sa KOJC, nakahatag og kaulaw ang pagmuntar og daghanang kapulisan gawas sa ilang compound nga duol sa airport gumikan posibleng makahuna-huna ang mga bisita nga gikan sa nagkadaiyang dapit nga adunay kagubot sa dakbayan.
Sumala pa ni Eleonor Cardona, executive secretary sa KOJC, nga gawas pa kay PBGen. Nicholas Torre III, dako og posibilidad ang kalambigitan sa pangulo niini hinungdan nga nagpaunhanay na lamang ang mga nagkadaiyang sakop sa otoridad nga magpakitang gilas sa pangulo.
Dugang pa niini, tungod kini sa paghatag og reward money sa US sa Pilipinas aron nga makita ug masikop si Pastor Quiboloy.
Nakahatag matud pa og pressure sa pangulo ang paghatag og mga apparatus gawas pa sa kwarta gikan sa US rason nga ginamanduan niini ang mga kapulisan nga tagaan og pokus ang isyu kay Pastor Apollo Quibooy bisan paman wala pa kini namapatud-ang saad sa nagkadaiyang alegasyon.
Una nang gikanayon sa mga myembro sa simbahan nga dakong kahibulongan kaayo ang sobrang paghatag og pagtagad sa pagkasikop sa pastor bisan paman wala kini mahatag nga dakong epekto sa kahimtang sa nasud kung galing madakpan.
Sigon pa nila, mas daghan og problema ang nasud nga angay tagaan og pagtagad, apan mas gipili sa mga opisyal nga sakyan ang isyu ni Pastor Quiboloy aron matabunan ang kakulangan sa kasamtangang administrasyon.
