DAVAO CITY- Nagpaguwa na og opisyal nga pamahayag ang Davao City Police Office (DCPO) kalabot sa nahitabong pagpusil-patay sa usa ka pulis sa iyang trato sa San Miguel, Monseda Compund, Brgy. Indangan, ning dakbayan, kagahapon.
Una nang gikataho nga selos ang tinubdan sa panaglalis sa duha ka magtrato nga sila Justine May Villaroja, hamtong ang pangidaron, ug residente sa Dumanlas, Buhangin ning syudad ug Patrolman Alvin Jhon Tayamin, active PNP member nga na-assign sa Mandug Police Station.
Sumala pa nga samtang nag-inom ang duha kagahapon sa kadlawn, wa damhang niresulta kini sa panag-away gumikan sa selos rason nga nibunlot sa 9mm pistol ang pulis og dayong gipusil si Justine sa iyang nawng nga maoy hinungdan sa iyang hinanaling kamatayon.
Kabahin niini, nagpaabot og kahisubo sa pamilya sa biktima ang DCPO dungan sa pasalig nga mas palawman pa ang imbestigasyon sa nahitabong insidente.
Samtang gipasalig sab sa buhatan ang walay pagdapig-dapig sa kung unsa man ang mamahimong resulta niiini sanglit hugot nilang ginakondena ang mga susamang dili maayong binuhatan sa kapulisan.
Sa karon, gi-did-an na sa pagtrabaho ang suspek ug gipanaad sa buhatan ngadto sa sa pamilya ni Justine nga mahatagan gayud og hustisya ang kamatayon niini.
