DAVAO DE ORO- Nikabat na sa P100,000 ang gitanyag nga reward money kon ganti alang sa kinsa mang makahatag ug adunay impormasyon sa responsable sa pagpatay sa Critically Endangered Philippine Eagle nga si Mangayon.
Kahinumduman nga igo na lamang narescue sa mga sundalo si Mangayon nga nagkadugo human nga naigo og “jolen” sa iyang wala nga pako.
Una nang nitanyag og P50,000 si Davao de Oro Governor Dorothy Gonzaga ug nidungag og laing P50,000 si Department of Environment and Natural Resources (DENR) Secretary Maria Antonia Yulo Loyzaga aron sa pagpakusog sa laraw nga madakpan ang responsable niini.
Ning kasamtangan, padayon ang paningkamot ug pagtinabangay sa mga hingtungdang ahensya aron mahatagan og hustisya ang kamatayon niini.
Subli sab kining nanawagan sa publiko nga magbinantayon kanunay ug motabang sa pag-amping sa wildlife species aron dili na mausab pa ang gidangatan ni Mangayon.
Alang sa kinsa mang adunay mahinungdanong impormasyon nga mahatag, mamahimong mobista sa DENR-PENRO Davao de Oro o di kaha magpadala og mensahe sa penrodavaodeoro@denr.gov.ph.
