DAVAO CITY- Subling nanawagan karun ang mga doktor ning atoang dakbayan sa katawhang Dabawenyo nga gikinahanglang masayod gayud sa cardio pulmonary resuscitation (CPR) aron mahimong makatabang sa panahon sa emerhensiya.
Sumala pa ni Dr. April Anne Rivamonte-Delola, Consultant sa Southern Philippine Medical Center kon SPMC nga kadaghanan sa rason nganong kinahanglan ang maong pag CPR gumikan sa mga higayong atakehon sa kasing kasing ang usa ka indibidwal.
Gani, gipasabot niini nga walay angay nga ikahadlok ang mga indibidwal nga gustong mag CPR ilabi na kung makita niini ang usa ka pasyenteng kinahanglan usab kini nga lakang.
Kahinumdumang nanawagan usab ang Department of Health (DOH) kalabutan sa importansya sa CPR diin daghang higayon na kini ang mamahimong tubag lamang unta sa mga emergency situation arun nga masalbar ang usa ka indibidwal sa kamatayon.
Daan na usab nga gipahayag ni DOH spokesperson Albert Domingo, ang CPR mao ang tulay tali sa kinabuhi ug pagkawala niini panahon sa cardiact arrest gumikan kay ang pagpatuman niini ang mahimong hinungdan sa subling pagpitik sa kasing-kasing.
Dugang gipahayag sa opisyal, sa mga high income nga nasud, ang ilahang CPR training rate ang mo-abot kini sa 50% ubos pa gihapon kung hunahuna-on apan sa ubang nasud lakip na ang Pilipinas, mas ubos kini gumikan kay duha lang sa napulo ka tawo o 23% lamang.
Dugang pa sa DOH Spokesperson, apektado ang cerebral perfusion o ang paghatod ug dugo sa utok sa higayong mohunong na sa pagpitik ang kasing-kasing nga mupadulong sa pagkadaot sa utok.
Samtang gipahayag ni Philippine Red Cross (PRC) Secretary General Gwendolyn Pang nga anaa sa 70,000 sa 119 milyong Pilipino ang nakasinatiug cardiac arrest ug 1% lamang niini ang nahatagan ug CPR.
