DAVAO CITY- Gisalmotan sa pipila ka mga negosyante ang gipahigayong trade fair sa Davao City Cacao Industry Development Council ug City Agriculturist’s Office sa usa ka mall, ning dakbayan, kagahapong adlawa.
Ang maong aktibidad ang kabahin sa pagsaulog sa World Chocolate Day diin gitambungan sa nagkadaiyang personahe gikan sa Department of Agriculture, Department of Trade and Industry, ug Department of Tourism, uban ang nagkadaiyang negosyante nga mipakita sa ilang nagkalain-laing produktong gibase sa cacao.
Kabahin niini, nagpaabot og mensahe si Davao City Mayor Baste Duterte pinaagi ni City Toursim Operations Officer in Charge Jennifer Romero diin nagkanayon sa pag-ila sa mga produktong cacao sa dakbayan.
Nagpaabot sab og pasalamat ang mayor sa mga prime movers sa industriya sa cacao hilabi pa sa mga hingtungdang ahensya alang sa padayong pagpalambo niini.
Gumikan niini, gipasalig sa lokal nga panggamhanan ang padayong suporta sa mga cacao farmers pinaagi sa paghatag kanila og libreng abuno, pagtanyag og mga seminars, kalakip na ang technical supports ug uban pa.
