DAVAO DE ORO- Kabsan sa kinabuhi ang usa ka lalaking pasahero human sa nahitabong disgrasya tali sa usa ka pick-up ug delivery van sa Brgy. Tuburan, Mawab, Davao De Oro, kagahapong adlawa.
Giila ang biktima nga si Benjie Gallarde Pevida, 29 anyos, residente sa P12, Brgy. San Jose Monkayo, Davao De Oro kinsa sakay sa pick up nga gimaneho ni Anjun Soberano Perez, 32 anyos, residente sa P1-A, Ugbobon, Tagbina, Surigao del Sur.
Subay sa inisyal nga imbestigasyon sa mga otoridad, paingon matud pa Tagum City ang pick-up samtang naglawig usabcsa pikas dalan paingon sa Nabunturan ang delivery truck nga gimaneho ni Mar Jun Luto, 36 anyos, residente sa Agdao, ning dakbayan.
Apan pag-abot niini sa nahisgutang lugar, kalit na lamang kining nagbangga rason nga nakahiagom og daghanang samad ug bun-og sa kalawasan ang mga driver kinsa parehong gipangdala sa balay tambalanan.
Gumikan sa kakusog sa impact, wala na naluwas pa ang pasahero sa pick-up nga maoy naipit sa maong insidente.
Ning kasamtangan, padayon pa ang ginalusad nga imbestigasyon sa mga kapulisan kalabot sa maong insidente.
Subli sab kining nagpahimangno sa mga driver sa pag-amping sa pagmaneho hilabi na panahon sa ting-ulan aron malikay sa disgrasya.
