DAVAO DEL SUR- Nakaplagan na ang patayng lawas sa usa ka lalaki nga naanod sa sapa sa Barangay Coronon, Sta. Cruz, Davao del Sur kaniadtong Hunyo 30.
Sumala pa mga mananagat, nakit-an ang maong patayng lawas bandang alas singko sa hapon kagahapon sa boundary sa Samal ug Santa Cruz nga kadagatan.
Kabahin niini, nagbangutan ang pamilya sa biktima nga giilang si Ramil Dulay, 47 anyos, residente Barangay Coronon, Sta. Cruz, Davao del Sur gumikan sa mismong adlawng natawhan pa niya kini nakaplagan.
Sigon pa sa pamilya ni Ramil, subo pamalandungon nga inay iselebrar ang dugang nga katuigan niini, wala na kini kinabuhi nga nagpakita kanila.
Kahinumduman nga naanod sa kusog nga bul-og sa tubig ang biktima kaniadtong Hunyo 30, human kini nawad-an og balanse samtang anaa sa kilid sa sapa gumikan na usab sa iyang pag-inom.
Subay sa report gikan sa kapulisan, nga buntag pa lamang sa susamang adlaw, nagtagay na sumala pa kini kauban ang iyang mga higala, apan wala damha nga atol sa iyang pag-uli, minaog kini padulong sa sapa nga ana lamang duol sa iyang panimalay ug aksidenteng nahulog ug naanod sa kusog nga bul-og sa tubig sapa.
Ning kasamtangan, nagpaabot na og pasalamat ang pamilya sa biktima ngadto sa mga hingtungdan ahensya nga wala niundang sa paglusad og operasyon aron lamang kini makaplagan.
Subli sab nagpahinumdom ang mga otoridad sa publiko nga dili mopaduol sa kasapaan atol sa mga pag-ulan ug pagbaha aron dili mabutang sa peligro ang kinabuhi.
