DAVAO DEL NORTE – Nakumpiska sa mga otoridad ang kinarton nga mga palusot nga sigarilyo human nga nababagan kini sa gipahigayon nga checkpoints sa kapulisan sa Tagum ug sa mga sakop sa kasundaluhan (Philippine Army).
Subay sa report gikan sa mga otoridad nababagan ang kinarton nga mga palusot nga sigarilyo sa Barangay New Balamban,Tagum City, Davao Del Norte sakay sa usa ka puti nga van.
Nasayran nga gipahugtan karong panahuna sa probinsya ang pagpahigayon ug chekpoint sa mga kadalanan nunot kini sa nagsingabot nga Bagong Pilipinas Serbisyo Fair nga kung diin pagatambungan kini sa mga kadagkuang opisyal sa nasud, apan kining puti nga van ang wala mohunong sa checkpoint area hinungdan nga gigukod kini sa mga otoridad ug gialarma ang uban nga nagpahigayon ug checkpoints sa nasapit nga syudad.
Apan sa ilahang pagpadayon sa paggukod nakita na lamang nila ang van nga giabandona na sa kili nga bahin sa karsada ug sa paghiling sa mga otoridad nasuta nga nagtapun-og ang mga kinarton nga palusot samtang walay nabilin nga mga indibidwal sa van ug gitouhan nga misibat na ang drayber human sa maong panghitabo.
Padayon pasab nga ginasubay sa mga otoridad ang kinatibuk-an nga kantidad sa mga nakumpiska nga mga sigarilyo.
Sa pagkakaron, naglusad na ug lawom nga imbistigasyon ang mga otoridad kung kinsa ang tag-iya sa sakyanan ingon man ang tag-iya sa mga kontrabando nga sa karon anaa na sa kostudiya sa kapulisan sa Tagum.
