DAVAO CITY – Midugang sa ilang paningkamot ang Traffic Enforcement Unit (TEU) sa Davao City Police Office sa pagsumpo sa mga kalapasan sa trapiko, apil na ang pagpatuman sa speed limit ug road clearing operations.
Gikataho ni DCPO-TEU head Police Major Dexter Domingo, ang 35% nga pagkunhod sa mga insidente sa pagkabangga sa kadalanan gikan sa Enero hangtod Abril 2024, nga adunay 1,329 nga natala nga mga insidente.
Ang mga proactive nga lakang sa TEU-DCPO, sama sa speed limit enforcement, road clearing operations, traffic direction control, ug checkpoints, nakatampo niini nga pagkunhod.
Uban sa 117 ka dedikado nga mga personahe, nagsiguro ang TEU sa seguridad ug kaluwasan pinaagi sa police visibility, traffic management, ug enforcement.
Gipahibalo usab ni Domingo ang mga plano nga ibalik ug palig-onon ang pagpatuman sa Republic Act No. 10586 kon Anti-Drunk and Drugged Driving Act of 2013, nga magsilot sa pagdrayb ubos sa impluwensya sa makahubog nga ilimnon.
Nasayran nga nakakuha og Alcohol Breath Analyzers (ABA) ang lokal nga gobyerno, nga adunay unom nga magamit karon ug 19 pa sa dalan.
Nihangyo sila og 20 ka dugang nga mga kahimanan, tumong nga matag police station adunay ABA kit samtang nagpaabot sa pagtugot sa deputization gikan sa LTO.
Giawhag ni Domingo ang publiko nga seryosohon ang balaod ug gitambagan nga dili magmaneho nga nakainom.
