DAVAO CITY – Nibangga sa poste sa kuryente ang usa ka pampasahering van atol sa nahitabong disgrasya sa may national highway, Licanan, Barangay Lasang, Davao City bandang alas-11:30 sa udto, kagahapon, Enero 3.
Nasayran nga 17 ka mga pasahero ang nangaangol sa maong insidente nga dali sab nahatagan og paunang tambal sa mga sakop sa Central 911.
Duna sab na-trap sa sulod sa van nga mga pasahero busa kinahanglang ransakon sa mga rescuers ang atubangan sa maong van.
Sumala sa inisyal nga imbestigasyon sa Bunawan PNP, wala mikagat ang preno sa maong sakyanan ug kalit lamang kini miliko ngadto sa poste.
Naapektuhan sab ang suplay sa kuryente sa ubang kabalayan sa maong dapit gumikan sa maong aksidente.
Kasamtangan nakakustodiya ang drayber sa Bunawan PNP lakip na ang sakyanan alang sa tukmang disposisyon.
