DAVAO CITY – Tingkagol sa bilangguan ang duha ka mga suspek nga nalambigit sa pagkaangol sa usa ka 29 anyos nga lalaki sa Purok 1B Bajada, Brgy. San Isidro, Manay, Davao Oriental, ning nilabayng adlaw.
Subay sa taho sa Manay PNP, giila ang mga suspek nga sila Jason Magbasa Cabagong, 29 anyos, mag-uuma ug residente sa Purok Macopa, Brgy. San Isidro, Manay; ug ang kauban niini nga si Gerald Magbasa Cabagong, 31 anyos, ulitawo nga nagpuyo sa susamang barangay.
Nasayran nga ilang gidunggab ug gipusil ang biktima nga si Cesario Damale Capricho, 29 anyos, usa ka laborer ug residente susamang barangay.
Naglusad gilayon ang mga otoridad og hot pursuit operation ang mga otoridad ug malampuson sab silang nasikop pagkaugma sa kaadlawon.
Nakumpiska gikan kang Cabagong ang usa ka unit sa caliber 45 nga pistola, usa ka magazine nga dunay sulod 4 ka mga buhing bala, usa ka sundang ug usa ka mubo nga improvised pistol nga dunay 2 ka mga buhing bala ug 3 ka fired cartridge, 4 ka mga buhing bala sa 12 gauge shot gun, ug 1 ka empty shell sa 12 gauge shot gun cartridge.
Natabang pa ngadto sa Davao Regional Hospital sa Tagum City ang biktima ug kasamtangang nagpaalim karong panahuna.
Gipasaka na ang kasong kalapasan sa RA 10591 o Illegal Possession of Amunition under the Commission on Elections Gun Ban batok sa mga suspek.
