DAVAO CITY – Kumpirmadong patay ang gipusil nga newly-elected barangay kagawad sa Barangay Sawata, San Isidro, Davao del Norte nga si Jay Glen Dela Rama.
Gikumpirma kini sa usa sa mga kabanay human kini nagpaalim kagabii sa Davao Regional Medical Center sa Tagum City.
Nasayran nga gipusil ang biktima sulod mismo sa iyang tindahan sa Prk Mahogany, Brgy. Sawata sa dihang nakasulod ang usa ka gunman ug diha dayon abtik nga nakasibat ang suspek sakay sa naghulat nga Yamaha aerox motorcycle nga walay plate number nga gimaneho sa kaubang suspek.
Nasuta nga tulo ka igo sa bala sa pusil didto sa iyang lawas ang nahiagum sa biktima. Nasayran nga nahitabo ang krimen, usa ka adlaw human ang iyang pagpanumpa isip usa sa gibotaran nga barangay kagawad sa ilang dapit.
Nagbangutan ang iyang pamilya, kabanay ug mga kaubanan ni Dela Rama nga dungang nanawagan og hustisya sa gidangatan sa nahisgutan.
Sa kasamtangan, nagpadayon ang San Isidro PNP sa imbestigasyon aron matino ang motibo ug responsable sa maong pagpamusil.
via || Bombo LJF
