DAVAO CITY – Nagpadayon gihapon sa pag-imbestiga ang Tagum PNP mahitungod sa pagransak sa Gaisano Grand Mall sa Tagum City ning nilabayng simana.
Sa ekslusibong pakighinabi sa Bombo Radyo Davao ngadto kang PLT Colonel Jeffrey Latayada, OIC sa Tagum Police, wala nila giwagtang ang anggulong inside job gumikan sa nakuha nga CCTV footage gumikan sa posibilidad nga adunay tawo nga nag-kuraw sa alarm system sa mall ug gituohang nakapasulod sa mga kawatan niadtong Setyembre 5 bandang alas-10 sa gabii diin nalimas ang anaa sa P9 milyones nga kantidad sa alahas sa usa ka jewelry store ug P4 milyones gikan sa duha ka ATM stalls sulod sa mall.
Gikumpirma sab sa hepe nga usa ka organisadong krimen ang nahitabo diin nasayran nga kumpleto sa gamit ang maong grupo sa kawatan.
Gikabutyag sa hepe nga kini ang labing unang higayon nga nahitabo ang maong pagpanransak sa syudad.
Apan iya sab gipasalig nga usa kini ka isolated case lamang ug nagpabilin gihapong luwas ang mga negosyante sa syudad.
Ginahikay pa sa Tagum PNP ang unod sa gipagulang resulta sa imbestigasyon sa lugar.
via || Bombo LJF
