DAVAO CITY – Gikatala sa Commission on Elections-Davao ang 47,637 ka mga mudaganay gikan sa 1,162 ka barangay sa Davao Region nga mi-file og certificates of candidacies (COCs) alang sa nagkalain-laing posisyon sa umaabot nga Barangay ug Sangguniang Kabataan elections.
Gikan sa maong ihap, 2,932 ka opisyal ang magpapili isip punong barangay; samtang 25,587 alang sa mga puwesto sa pagka-Kagawad; 3,050 alang sa pagka-Sangguniang Kabataan chairperson; ug 16,068 alang sa SK members.
Dinhi sa dakbayan, dunay 8,030 ka mga kandidato sa BSKE alang sa 172 ka mga barangay. Gikan sa maong ihap, 471 ang kandidato pagka-Kapitan; 4,569 ang kandidato alang sa pagka-Kagawad; 493 ang kandidato pagka-SK Chairperson ug 2,497 ang kandidato pagka SK Kagawad.
Nagpahimangno si Atty. Gay Enumerables, COMELEC-Davao assistant regional director, ngadto sa mga opisyal nga kandidato nga likayan ang premature campaigning, gumikan kay mamahimo kining basihanan sa disqualification sa eleksyon. Magsugod ang campaign period karong Oktubre 19 hangtod 29.
Wala pay nadawat nga reklamo o petisyon ang COMELEC aron ideklarar nga “nuisance” ang bisan kinsang kandidato.
Samtang idiskwalipika sab alang sa piniliay ang mga kandidato nga dunay paryente sulod sa second degree sa incumbent nga mga opisyal sa gobyerno sa pagdagan sa SK election, apan dili sakop niini ang mga kandidato alang sa barangay election.
Hingpit sab nga dili tugutan ang pagpakig-alayon sa mga political parties ang mga kandidado panahon sa pagpangampanya. Sigurohon sab sa COMELEC Davao nga mapahamtangan og kasong kriminal ug administratibo kadtong mga nalambigit sa pre-mature campaigning.
Gikatakdang ipasa na ngadto sa kauluhan ang tanang mga COCs sa mga mukandidadto sa BSKE nga ipahigayon karong a-30 sa Oktubre, 2023.
via || Bombo LJF
