DAVAO CITY – Mainitong gidawat sa local goverment sa Quezon City sa kauluhan ang mga opisyal sa City Government of Davao nga mibisita niini aron mahibal-an ang tanan bahin sa QCitizen ID.
Ang QCitizen ID maoy unified identification system sa dakbayan sa Quezon nga nagpasayon sa mga residente sa pagpahimulos sa ilang kaugalingon sa mga serbisyo sama sa libreng sakay ug ubang social services nga dalit sa Quezon City LGU.
Unang gilusad kaniadtong 2021 ang pagpatuman niini ilawom sa pagpangatundanan sa ilang kasamtangang mayor nga si Joy Belmonte.
Nahibal-an sa mga opisyal sa Davao City ang proseso sa pagkuha sa QCitizen ID, gikan sa pag-file sa aplikasyon hangtod sa pag-release sa card.
Nasayran sab ang makuti nga proseso sa pagtuki sa mga detalye aron mahatagan og haom nga serbisyo ang mga residente nga nahilakip niini.
Kabahin kini sa pagpakusog sa digitalization services sa dakbayan alang sa mas epektibo nga paghatag og serbisyo sa katawhan.
Atol sa maong panagtagbo, ilang gibisita usab ang QCID Office, Persons with Disability Affairs Office, ug Office for the Senior Citizens’ Affairs sa Quezon City.
