DAVAO CITY – Padayon gihapon nga ginasuta sa kapulisan sa pagpanguna Special Investigation Task Group (SITG) Bragas ang ika-upat nga suspek sa maong rape-slay nga ning kasamtangan, wala pa gisapubliko ang pangalan. Giklaro karon ni Davao city Police Office Director PCol. Alverto Lupaz nga padayon usab ginapangita sa ilahang grupo ang kolor yellow nga ombak nga gisakyan sa biktima nga si Arch. Vlanche Marie Bragas kinsa nakapalgan na lamang ang patayn’g lawas niini sa usa ka banana plantation sa Calinan Davao City, semana na ang nilabay.
Kung kahindomdoman, una nang gibutyag atol sa SITG Bragas ang tulo ka suspek sa paglugos patay nga mao sila Dennis Panzan, Kent Lawrence Espinosa, Renato “Empoy” Bayansao. Gawas sa 34 ka unit sa bao-bao nga pareho og porma nga gigamit sa suspek, gikanayon ni Lupaz nga bisan ilisan og kolor ang ombak, masuta gihapon kini ug mailhan sa mga kapulisan.
Nagdumila usa ang SITG bragas sa paghatag og dugang pa nga detalye mahitungod sa impormasyon nga ilang nadawat kabahin sa tag-iya sa ombak nga gigamit sa krimen.
Subay sab sa imbestigasyon sa kapulisan, gikanayon ni Lupaz nga nasuta nila base sa record sa LTO-XI nga dunay na rehistro nga motor nga rossi ilawom kang Empoy, kinsa unang gipahimakak sa kabanay niini nga dili kini kabalo mumaneho og motor ug wala kini driver’s license.
Ning kasamtangan, bugtong si Empoy lamang ang anaa karon sa kamot sa kapulisan samtang nagpabiling missing si Espinosa ug kon kahinumduman patay na si Panzan kinsa gidagit ug naka-ikyas gikan sa matud pa midukot kaniya, apan nakabsan kini sa kinabuhi sa balay tambalanan human gidala kini sa mga nakakita kaniya.
