DAVAO CITY – Gibutyag ni Roldan Panzan, igsoon sa namatay nga si Dennis Panzan, kinsa, gipasanginlan nga suspek sa pagpanglugos-patay kay Bragas ngadto sa Bombo Radyo Davao nga nagool kini basig siya napud ang hilabtan tungod sa pagkamatay ni Dennis nga iyahang alalay usab sa iyahang meat shop sa Calinan nga metros lang ang gilay-on gikan sa balay ni Bragas.
Gisaysay niya ang mga panghitabo ayha gi-kidnap pagkagabie ang iyahang igsoon, diin matud pa niya, adunay mga nagpailang miyembro sa NBI ang niadto mismo sa ilahang meat shop ug gipangayoan silag ID, gi-picturan kini sa pipila ka mga miyembro ug gi-interview matud pa si Dennis sa likod sa ilahang tindahan. Gitaparan ang nahisgotan sa usa ka miyembro ug nagpagawas kini og .45 caliber nga pusil.
Dugang butyag pa ni Roldan nga atol sa pagkawala sa iyahang igsoon, nidool kini sa Calinan Police Station aron i-report ang maong panghitabo apan, gitambagan sila sa mga kapulisan nga dili modoul sa mga media outlet o mag-post man lang sa social media mahitungod sa pagkawala sa iyahang igsoon.
Saysay pa niya, nga naabtan pa usab og pila ka mga adlaw bag-o gi-asikaso sa maong istasyon ang police reports nga gipasaka niya.
Sa pagkakaron, dako ang katingala ni Roldan nganong human nga nawala ang iyahang igsoon, naundang na usab ang pagbisita sa mga investigator ngadto sa ilahang area.
Sa pikas bahin, nagpagawas karon og usa ka video ang kabanay ni Dennis nga nagpamatood nga kauban nila kini sa usa ka selebrasyon sa Barangay Los Amigos sa Calinan atong gabiuna nga nawala si Architect Bragas.
