DAVAO CITY – Gikubkob sa mga otoridad ang patayng lawas sa kanhi myembro sa NPA sa Barangay Coronobe, Maragusan, Davao de Oro.
Giila kini sa 1001st Infantry Brigade nga si Leonardo Ellera Sr., kanhi lider sa napuhag nga Guerrilla Front 2 sa New People’s Army. Sumala pa sa commander sa 1001st Infantry Brigade nga si Col. Ronnie Babac, nakuha ang impormasyon sa gigikanan sa maong lider gikan sa nagpailang Jeg, kanhi commanding officer sa DGF-2, diin nahimong witness sa kamatayon sa nahisgutan ang nitaliwan sab niyang anak nga si Leonardo Jr.
Nitahan si alyas Jeg niadtong Hulyo 2022 uban sa iyang asawa nga kanhi sekretaryo sa rebeldeng grupo, ug lain pang duha ka kaubanan niini.
Gibutyag sab nga hypothermia ang hinungdan sa iyang kamatayon nga nahitabo niadtong Abril 27, sa nakalabayng tuig.
Matud pa, napugos na lamang nga gilubong si Ellera sa maong dapit gumikan sa walay hunong nga combat operations sa kasundaluhan.
Gihatud sa pamilya ang patayng lawas sa maong rebelde sa ilang panimalay sa Barangay Del Pilar, Mabini, ug dayong gilubong kini pagkahapon sa susamang adlaw.
via || Bombo LJF
