DAVAO CITY – Duha ka biktima nga naangol human sa usa ka disgrasya sa Dawis Provincial Road, Dawis, Digos City, Davao del Sur ang kasamtangang nagpaalim karon sa mga balay tambalanan sa dakbayan.
Sumala sa insiyal nga imbestigasyon sa Digos City Police Station, nagbangga ang duha ka motorsiklo sa maong dalan bandang alas-11:10 sa gabii, adlawng Dominggo, Abril 16.
Giila ang mga samaran nga sila Patrolman Melvin Alipio Deloy Jr. , 27 anyos, usa ka pulis nga nadestino sa Davao del Sur Police Provincial Office, residente sa 1937 Lim Extension, Barangay Zone-3, Digos City, ug nanag-iya sa usa ka Yamaha sniper motorcycle; ug ang drayber sa Euro motorcycle nga giilang si Carlito Batingal, Jr., 29 anyos, taga-Purok Pag-asa, Forget Me Not Street, Bansalan, Davao del Sur.
Sigon sa report, gibaybay ni Patrolman Deloy Jr. ang dalan sa Digos Diversion Road gikan Aplaya paingon sa Hagonoy.
Samtang paingon Dawis Beach gikan San Jose, Digos City ang laing motorista nga si Batingal.
Dihang nagbangga ang ilang gimanehong motorsiklo nga nagresulta sa pagkahiagum og physical injuries.
Gikustodiya na ang duha ka motor lakip na ang OR/CR niini sa Digos City Police alang sa tukmang disposisyon.
via || Bombo LJF
