DAVAO CITY – Mipasailawom sa Culture of Security seminar ang mga trabahante sa Davao City Overland Transport Terminal nga gipangunahan sa Task Force Davao kagahapon.
Sumala kang DCOTT manager Dr. Aisa Usop, anaa sa dul-ang 70 ka mga personahe sa terminal nga gilangkuban sa mga porters, canvassers, peddlers ug vendors ang gibansay ug gipanggiyahan sa gipasibaw nga Culture of Security diri sa Davao City.
Giawhag sa TF Davao nga batasanon ang four acts sa Culture of Security nga Volunteer, Report, Remind, ug Participate, nga magtuklod sab kanila nga i-report ang mga namatikdang kadudadudahang buhat sa terorismo.
Kini agig pagpangandam sab sa terminal alang sa umaabot nga Kwaresma tungod sa gilaumang influx sa mga nasa syento libo ka mga pasahero paingon ug paggawas sa Davao City.
Samtang nagpahigayon sab og Oplan Harabas ang PDEA, LTO, Highway Patrol Group ug LTFRB diin giasailawom sa surprise drug test ang 600 ka mga driver sa traysikel, jeepney, bus ug PUVs, lakip mga kunduktor.
Gikumpirma sa LTFRB nga dunay duha ka mga nag-positibo atol sa gipahigayong drug test nga giilang usa ka van driver sa Tagum City ug usa ka kunduktor sa bus padulong Digos City.
Siguruhon sa mga ahensya ang kaluwasan sa mga manakayay, ug ang katakus sa mga drayber nga luwas nilang mahatud ang mga pasahero paingon sa mga destinasyon.
via || Bombo LJF
