DAVAO CITY – Pipila ka bulan pa lamang sukad sa pagsugod sa 2023, namatikdan na ang pagsaka sa kaso sa rape diri sa Dakabayan sa Davao, subay sa datos gikan sa Davao city Police Office (DCPO), nag-una gihapon sa listahan sa walo ka mga focused crimes ang rape kon pagpanglugos diin dunay 15 ka mga kaso ang natala gikan sa bulan sa Enero hangtud Pebrero karong tuiga.
Gisundan kini sa Theft kun pagpangawat nga adunay 10 nga kaso mas ubos kung itandi niadtong nakalabayg tuig nga anaa sa 16 ka kaso gikan Enero hangtud Pebrero. Samtang gikaalarma sab karon sa buhatan ang pagsaka sa ihap sa kasong murder nga anaa na sa ikatulong pwesto sa 8 focused crimes.
Apan gikalipay sa kapulisan nga ubos ang kinatibuk-ang ihap sa crime volume karong tuiga kung itandi niadtong nakalabayng tuig 2022 nga adunay 78 nga kaso samtang karon anaa lamang sa 45 gikan January-February.
Padayon karon ang pagpaningkamot sa DCPO nga makunhuran ang ihap sa krimen sa dakbayan pinaagi sa pagpahigayon og hugot nga monitoring sa syudad labi pa nga adunay pipila ka dagkong aktibidad ang nakatakdang ipahigayon sa syudad.
