DAVAO CITY – Hingpit nang gitudlo isip bag-ong PNP Regional Office 11 Regional Director si Brigadier General Alden Delvo.
Kana atol sa natigayong lahugay o reshuffling sa mga bag-ong opisyales sa Philippine National Police kagahapon sa panguna ni PNP chief General Rodolfo Azurin Jr.
Onse ka mga bag-ong opisyal ang gitudlo sa hepe nga nahatagan ug mga bag-ong posisyon epektibo kagahapon, adlawng Biyernes, Marso 17.
Hulipan ni BGen Delvo isip manguna sa kapulisan sa Rehiyon Onse si BGen Benjamin Silo Jr. nga madestino karon sa Civil Security Group.
Gikumpirma ni Major Eudisan Gultiano, tigpamaba sa PRO 11 nga ilang nang gidawat ang kamanduan gikan sa Camp Crame bahin sa kabag-uhan sa liderato sa regional police.
Una pa man ang maong posisyon, ang tubong Davao nga si Delvo ang nahimong executive officer sa Directorate for Intelligence, ug acting executive officer sa Area Police Command Western Mindanao.
Kabahin siya sa PNP Academy Sandigan batch 1994 ug nagsilbi sa Davao City Police Office.
via || Bombo LJF
