DAVAO CITY – Gibisita ni DSWD Secretary Rex Gatchalian ang buhatan sa 10th Infantry Division sa Mawab, Davao de Oro aron susihon ang warehouse sa 10ID diin ibutang ang mga ipanghatag nga hinabang gikan sa ahensya ngadto sa mga nabiktima sa nahitabong linog sa probinsya.
Gisugat ang kalihim ni 10ID Commander Major General Jose Eriel Niembra ug nila Davao De Oro Governor Dorothy Montejo-Gonzaga ug Congressman Ruel Peter Gonzaga.
Nakigpulong una ang matag opisyal alang sa lakang nga pagahimoon sa panghatag og hinabang panahon sa kalamidad, human gisusi sab ang structural integrity sa warehouse sa 10ID nga mamahimong kabutangan sa mga food packs nga ipanghatag sa DSWD.
Gidawat ni Major General Niembra ang mga inisyatibo sa ahensya isip pagpalugway sa pagresponde sa 10ID niining kalamidad nga gisagubang sa katawhan sa Davao de Oro.
via || Bombo LJF
