DAVAO CITY – Gipasakaan na ug kasong double murder ang kanhi Area Manager sa Civil Aviation Authority of the Philippines (CAAP) XI gumikan sa pagpusil patay niini sa iyahang live in partner lakip na sa ilahang katabang.
Nagsulay pa kuno sa pag-eskapo ang suspek homan sa nahitabong krimen apan nadakpan kini sa kapulisan pipila ka metro ang gilay-on gikan sa crime scene. Giila ang suspek nga si Frederick Gerona San Felix, 70 years old, kanhi Area Manager sa (CAAP) XI ug residente sa Blk 11 Lot 37&39, Susana Homes, Baliok, Davao City, samtang giila usab ang mga biktima nga sila Zindy Flores Floreindo ug Catherine Langgam, 25-anyos.
Subay niini, gipahayag ni Baliok Police Station Commander Police major Romero Mapanao Jr, crime of passion ang motibo sa krimen ug pipila kahigayon ng nagkaatubang ang mga nahisgutan sa barangay gumikan sa selos.
Ang suspek ug ang biktima ang adunay duha ka mga anak nga nag-edad sa ocho-anyos ug unom katuig. Na-recover sa crime scene ang Gloc .40 caliber pistol, magazine ug duha ka slugs sa bala.
