DAVAO CITY – Gihatod na sa mga tagtungod ang patay’ng lawas usa ka sakop sa New People’s Army nga nakabsan sa kinabuhi human sa nahitabong engkwentro sa Sta. Margarita, Baggao, Cagayan.
Gihatud sa mga sakop sa 17th Infantry Battalion ilawom sa 5th Infantry Division ang patayng lawas ni Didi Andel alyas Sisoy pinaagi sa C295 aircraft sa Philippine Airforce.
Ang amahan ug ang igsuon mismo ni alyas Sisoy ang personal nga midawat sa patayng lawas niini nga gikatakdang ihatud sa iyang pinuy-anan sa Sitio Tibukag, Barangay Dagohoy, Talaingod, Davao Del Norte.
Taliwala pa man sa kasakit nga giantus sa biniyaang pamilya sa namatay nga rebelde, nagpasalamat gihapon ang pamilya sa mga kasundaluhan sa paghatud sa patayng lawas ni alyas Sisoy nga matud pa siyam ka tuig nilang ginapangita.
Kahinumduman nga kaniadtong Pebrero 17, nagka-engkwentro ang mga sakop sa 17th Infantry Battalion ug ang mga myembro sa Komiteng Probinsya Cagayan ug Isabela, Komiteng Rehiyong-Cagayan Valley ubos sa New People’s Army sa Barangay Sta. Margarita, Baggao, Cagayan sa Luzon nga gikamatyan ni alyas Sisoy.
via || Bombo LJF
