DAVAO CITY – Muabot sa kapin P325,000 nga kantidad sa ilegal nga droga ang nasakmit sa Task Force Davao kaniadtong adlawng Sabado, Pebrero 11, atol sa gitaganang checkpoint sa managlahing border control sa dakbayan sa Davao.
Sumala sa Task Force Davao, unang naharang sa kasundaluhan bandang ala-una sa kaadlawon, ang anaa sa 0.30 gramos kon nasa P4,800 nga kantidad sa gidudahang droga gikan sa dinakpang si Ford Christopher Faciol, 30 anyos, residente sa Bajada, Davao City.
Nadakpan si Faciol sa may Border Checkpoint sa Barangay Lasang sakay sa usa ka pampasaherong jeep dihang nakumpiska ang maong droga.
Pagkahapon bandang alas-singko, sa susamang adlaw dihang nakuha ang 19.96 gramos o kapin P319,000 nga kantidad sa gituohang droga gikan sa laing dinakpan nga giilang si Alfin Salazar, 36 anyos, taga-Manuel Guianga, Tugbok, Davao City.
Sakay sa usa ka traysikel paingon sa dakbayan si Salazar dihang nihunong kini sa checkpoint ug nasayran nga dunay unod nga droga sulod sa iyang ziplock plastic.
Balhug sa prisohan sa Bunawan Police Station ang duha ka dinakpan nga pulos mag-atubang ug kasong paglapas sa Republic Act 9165 o Comprehensive Dangerous Drugs Act of 2002.
via || Bombo LJF
