DAVAO CITY – Hustisya ang gusto makab-ot sa pamilya sa 21 anyos nga babayeng biktima sa nahitabong hit and run sa dalang Mc Arthur Highway Matina ning dakbayan sa Davao pasado alas 12:00 sa tungang kagabhion.
Giila ang biktima nga si Ana Mae Talili, usa ka cashier sa Matina Town Square.
Nanarbaho matud pa si Ana Mae aron nga makatigom ug makapaenrol sa eskwelahan isip 2nd year college sa kursong education.
Nasayran subay sa impormasyon gikan sa kapulisan nga angkas ang biktima sa motor sa iyang boyfriend nga giilang si Jayrald Damaulao, 21 anyos, usa ka cook ug ang duruha susamang mga residente sa New Loon Bagong Silang, Purok 18, Tugbok ning syudad.
Samtang naglawig sa kadalanan ang mga nahisgutan sabay ang ig-agaw niini nga sakay usab sa laing motor aron mupapauli na unta sa ilang panimalay, kalit na lamang sa wala damha gidasmagan ang ilang motor sa usa ka puti nga pick-up.
Gumikan sa kakusog sa impact, nalagpot ang motor atbang sa usa ka establisyemento sa mga sakyanan rason nga nalagpot usab ang helmet ni Ana Mae.
Sa nahitabong aksidente, nakaangkon og grabeng injury si Ana Mae rason nga sa dihang miabot na ang mga personahe sa Central 911, gideklara kining dead on the spot samtang ang drayber sa motor nakagawas na gikan sa SPMC niadtong nakalabay nga adlaw ug nagapaabot usab sa resulta sa imbestigasyon sa kapulisan.
Sa pagkakaron, padayon gihapon nga ginaimbestigahan sa kapulisan sa Ecoland Police Station – Traffic Enforcement Unit ang panghitabo ug ginapanubayan na ang nakuhang CCTV footage sa maong lugar.
Dugang pa niini, gibutyag ni SPO2 Ruel Desoyo, imbestigador sa insidente, nga wala pa na-verify ang plate number sa maong sakyanan nga daling miikyas human sa aksidente.
Nasayran nga bisan adunay CCTV, dili gihapon maklaro ang plate number tungod naga-reflect kini ug adunay suga sama sa usa ka reflector.
Gani, ilaha usab nga ginapanubayan ang uban pang mga kwerpo sa kapulisan kung ugaling adunay misurender apan niining kasamtangan, wala pay mitungha.
Samtang sa pagreview sa kapulisan sa CCTV, nawala matud pa sa highway ang suspek ug sa ilang teorya, tingali og misubay kini og laing dalan.
Nasayran nga ayha paman ang disgrasya, approaching to stop ang motor samtang ang pick-up namatikdang paspas ang pagpadagan.
via || Bombo AFS
