DAVAO CITY – Padayon pa gihapong ginapangita ang tulo ka mga suspek/respondents nga nalambigit sa pagpusil-patay sa negosyante ug modelong si Yvonette Chua Plaza nga mao sila Corporal Rolly Cabal, Corporal Romart Longakit ug sibilyan nga si Noel Japitan.
Kahinumduman nga makonsiderang Case Cleared but Not Closed ang kaso sa pagpatay kang Plaza gumikan aduna pa gihapoy pipila ka mga suspetsado ang pabilin pang ginapangita.
Sa pakighinabi sa Bombo Radyo Davao kang Capt. Mark Anthony Tito, tigpamaba sa 10th Infantry “Agila” Division sa Philippine Army, gikanayon niini nga si Corporal Cabal ang nag AWOL o absents without official leave ug ginakonsidera kining missing ning kasamtangan.
Samtang si Noel Japitan, usa ka sibilyan, ang wala pa gihapon igkita ning panahona.
Gikanayon sab ni Capt. Tito nga missing sab ug tingali gi-kidnap si Corporal Longakit.
Sa pikas bahin, gikumpirma sa opisyal nga anaa gikustodiya karon sa 10th ID si Staff Sergeant Gilbert Plaza, Corporal Adrian Cashero (driver sa gigamit nga motor atol sa krimen), ug Sergeant Delfin Sialsa kansa mao ang gunman.
Kahinumduman nga niadtong Enero 25, adlaw’ng Miyerkules, sa dihang gipagawas sa Special Investigation Task Group Plaza ang resulta sa ilang imbestigasyon nga nagtudlo kang BGen. Jesus Durante III isip mastermind sa krimen ug siyam pa niyang kaubanan nga responsable sa kamatayon ni Plaza.
Via || Bombo Allianne Ferandos Silao
