DAVAO CITY – Na-retreive na patayng lawas sa usa sa duha ka mga bata nga gikatahong nalumos sa usa ka sapa sa may Prk. 6, Lower Apokon, Tagum City kaniadtong Dominggo.
Subay sa report, bandang alas-dos sa hapon kagahapon, gikumpirma mismo sa iyang pamilya ug kabanay nga mao ang patayng lawas ni Diana Lyn Javier, 7 anyos.
Nakit-an ang naglutaw-lutaw nga patayng lawas sa batan-on sa usa ka mananagat atol sa iyang pagpangisda sa kadagatan sa Brgy. Bucana, Maco, Davao de Oro.
Dali-dali niyang gihaw-as ang maong patayng lawas ug gilayong nag-report kini sa myembro sa Bantay Dagat sa ilang dapit.
Dali usab kining gi report sa mga personahe sa Special Action Force, ingon man sa mga pamilya sa maong bata. Kasamtangang nagpadayon ang retrieval operation sa mga otoridad aron makit-an ang lain pang bata nga si Jessa Mae Camilo, 9 anyos.
Nagtabang-tabang karon ang mga otoridad sa pagpangita sa nawalang batan-on samatang gipaabot ang mga pahasubo ngadto sa pamilya ni Diana Lyn.
via || Bombo LJF
