DAVAO CITY – Gihinumdum sa 1003rd Brigade ang ilang kalampusan sa pagpuhag sa rebeldeng grupo nga SRC5, usa ka tuig na ang minglabay.
Gisaulog kini uban sa mga kanhi myembro sa maong rebeldeng grupo nga gisagop sa mga militar kaniadtong Enero 13, 2022, sa Mount Minalong, Kitaotao, Bukidnon.
Atol sa anibersaryo sa maong kalampusan nga gisaulog sa bag-ong headquarters sa Brgy. Malagos, Calinan, ning dakbayan, gikanayon ni Commander Brigadier General Consolito Yecla nga ang pagkahagsa sa SRC5, dili lamang kini magpasibaw sa ilang kadaugan, kung dili ang kaluwasan sa mga kanhi mga myembro sa grupo ug sa ilang pamilya.
Una nang naghatag og pasalamat sa militar si alyas Mandy tungod sa tabang ug interbensyon nga ilang nadawat arong hingpit nang makabalik sa siblisadong kinabuhi ug makamatngon sa kamatuoran.
Gipadayag sab ni Assistant Division Commander Brigader General Allan Hambala, sa ngalan ni 10ID Commander Major Gen Nolasco Mempin, ang pagpasalamat sa 1003rd Brigade tungod sa pagkalampus sa ilahang misyon nga sayo sa gitaganang oras, hapsay ug malinawon gumikan sa walay natalang human rights violation.
Atol sab sa kasaulogan, gininganlan ang bag-ong headquarters nga Mt. Minalong Hall, isip paghatag og dungog sa lugar diini mitahan na sa gobyerno ang SRC5.
via || Bombo LJF
