DAVAO CITY – Nahipos sa Bureau of Internal Revenue Regional Office – Digos City District Revenue Office ang kinahon-kahon nga mga gipalusot nga sigarilyo. Kini human sa malampusong operasyon sa BIR kauban ang regional Maritime Police.
Subay sa imbestigasyon, anaa sa 820 ka karton sa nagkadaiyang brand sa sigarilyo ang nahipos sa otoridad. Base sa inisyal assessment anaa sa kapin kon kulang P22.5 milyon matod pa ang buhis nga nahikaw sa panudlanan sa gobyerno sa maong kontrabando.
Gilauman usab nga mukabat sa 225 milyon 550 thousand pesos ang multa mga bayran sa tag-iya sa pinalusot nga sigarilyo. Nasayran nga giangkat gikan sa Malaysia ang maong mga sigarilyo.
Sa karon nibalibad ang otoridad sa pag divulge sa indentity diin nakapangalan ang maong mga kontrabando, kini gumikan nitaliwan na matod pa ang nahisgutan.
Nasubay usab sa imbestigasyon nga ang anak sa tag-iya nga maoy nipuli sa pagdumala sa negosyo, maoy naggunit sa cigarette smuggling activities sa Digos City.
Samtang gikatakda nga karong adlawa ipagawas sa BIR ang ubang detalye sa operasyon sanglit giplastar pa sa otoridad ang tanang ebidensiya ug dokumento nga gikinahanglan aron ipasang-at sa suspetsado.
