DAVAO CITY – Hugot ang pagtoo karon sa pamilya ni Katherin Cabiling, ang 18 anyos nga estudyante nga nakaplagang patay sa baybay nga bahin sa may Dahican Mati City nga ang uyab niini ang suspek sa kamatayon sa biktima.
Sa pahayag sa iyang amahan nga si Richard Cabiling, giingong nakita matud pa nila ang mga mensahe sa suspek ug sa iyang anak pinaagi sa messenger nga maoy nagsilbi nilang ebidensya.
Nasayran nga sa maong mensahe, gihagad sa suspek si Katherin nga adtoon siya sa baybay ug nitubag pa ang biktima nga muadto siya basta dili lang siya hilabtan.
Gibutyag usab sa ig-agaw ni Katherin nga si Cherjan Dulano nga napugos lang matud pa ang biktima nga makigrelasyon sa uyab niini tungod ginablackmail kini pinaagi sa mga hubo nga mga hulagway ug videos ni katherin nga gunit sa suspek.
Giingong bulan sa Nobyembre nagsumbagay na si Cherjan ug ang uyab ni Katherin tungod iyang nakit-an nga ginasipa ug ginahapak ug bag sa suspek ang iyang ig-agaw.
Una na matud pang mibungat og pulong ang uyab ni Katherine nga dunay dautang mahitabo kung magbulag sila ug nasayran nga sa milabay nga simana bulag na sila sa suspek.
