DAVAO CITY – Balhug karon sa prisohan sa Sto. Tomas Municipal Police station ang usa ka alyas Bombom human kini nasikop sa kapulisan atol sa buy-bust operation nga gipahigayon sa Purok 1, Barangay Balagunan, Sto. Tomas, Davao del Norte.
Giila ang suspek nga si Bryan Tadle, 42 anyos, minyo, gikonsidera nga top 3 municipal target list, ug residente sa susumang dapit.
Nadakpan si alyas Bombom human kini nabaligya ug usa ka paketa sa sachet nga adunay unod sa gituohang shabu, nga motimbag og usa ka gramo nga mobalor og Php 10,000 ngadto sa usa ka PDEA agent nga nagpakaaron ingon buyer.
Narekober sab atol sa operasyon ang onse ka sachet sa manag-lahi nga porma nga motimbag og kapin-kulang 4 ka gramo nga dunay street value nga Php 60,000, drug paraphernalia ug buy bust money.
Kasamtangang ginahikay na ang kasong paglapas sa Republic Act 9165 kon Comprehensive Dangerous Drugs Act of 2002 batok sa suspek.
via || Bombo Hanna Rallos
