DAVAO CITY – Usa ka doktor ug mental health advocate ang nagpasabot nga usa sa mga nag-unang sulirang medikal ang anxiety ug depression ug angay lamang kini hatagan og tumang pagtagad ug pagsabot sa kadaghanan.
Sa pakighinabi sa Bombo Radyo Davao kang Dr. Anuj Gabak, associate sa Philippine Mental Health Association, iyang gikanayon nga duna gihapon nagpahinabong stigma sa maong hisgutanan gumikan sa dili igo nga pag-ila sa kadaghanan sa mga timailhan sa tumang kabalaka ug kagul-anan sa usa ka tawo.
Mamahimo sab nga dili makasulti dayon ang tawo nga nakaeksperyensya niini tungod sa kahadlok nga mapaulawan o dili kaha, ang pagpaubos sa mga senyales.
Dili sab angayng kahimut-an ang pagbaton ug kagul-anan sa usa ka tawo. Sanglit, angayng masayaran ang tinubdan niini aron matabangan.
Labaw nga gihingusgan sab ang kanunay nga pakigistorya sa higala ug pamilya aron dili musamot ang iyang nasinatiang personal nga kalisdanan.
Giawhag sab ni Dr. Anuj nga pahimuslan ang libreng psychological services nga dalit sa gobyerno, lakip na ang mga hotlines aron mahatagan ug medikal nga hinabang ug interbensyon.
Importante sab ang pag-atiman sa kaugalingon kon self-care aron mabatukan ang hilabihang epekto sa maong balatian. Sumala sa Department of Health, gibana-banang anaa sa dul-ang 3.6 million ka mga Pilipino ang nag-atubang ug mental issues lakip ang anxiety ug depression.
Samtang close to 1 in 10 young Filipino adults kon 8.9% ang nakasinati ug moderate to severe nga mga sintomas sa depression.
via || Bombo LJ Florendo
