DAVAO CITY – Arestado ang usa ka construction worker human nasakpang naghupot ug ilegal nga droga atol sa gilusad nga buy-bust operation sa may Bypass Road, Punad Village, Brgy. Angliongto, Davao City, niadtong Sabado.
Giila sa Sasa Police ang suspek nga si Jarine Jade Suic Andan alyas Pula, 18 anyos, mingyo, lumulupyo sa Purok 2-B, Salmonan, Brgy 23-C, ning dakbayan.
Nasignit gikan kang alyas Pula ug usa ka punto otso gramos nga pakete sa gidudahang shabu, P500 marked money nga gigamit sa operasyon, ug usa ka improvised handgun nga dunay buhing bala sa punto trentay otso nga revolver.
Paslak na sa prisohan sa Sasa Police Station ang maong suspek ug gipasaka na ang mga kasong pagsupak sa RA 9165 o Comprehensive Dangerous Drugs Act of 2002 ug RA 10591 o Comprehensive Firearms and Ammunitions Regulation Act.
