DAVAO CITY – Nagresulta sa pagpamusil ang nahimong operasyon sa mga sakop sa Sta. Ana Police kagahapon sa buntag sa may Waling-Waling St., Brgy. Leon Garcia, Agdao, ning dakbayan diin nakabsan sa kinabuhi ang suspek nga giilang si Richard Alvarado Dabal alyas Bading, 22 anyos, lumulupyo sa maong dapit.
Subay niini, nakadawat ug report ang kapulisan mahitungod sa duha ka armadong lalaki nga naghupot ug armas. Miresponde dayon ang mga sakop sa Sta. Ana Police ug nagapaniid sila sa lugar.
Human naplagan sa mga armado ang presensya sa pulis nga nagpundo sa usa ka payag, gipabuthan nila kini. Nakaikyas ang usa ka suspek samtang gigukod sa mga pulis si alyas Bading.
Nagbinayluay ug pabuto sa ilang pusil ang suspek ug mga otoridad, ug sa dihang napusilan nila si alyas Bading nga gitabang pa ug dala sa ospital apan gideklara nang dead on arrival.
Nasignit sa mga pulis ang kalibre punto kwarentay singko nga pistola, mga buhing bala ug usa ka sudlanang nag-unod ug walo ka pakete sa gidudahang shabu.
Lain pang mga pakete sa shabu, marijuana ug ubang hinagiban sab ang nakuha sa ospital kung asa gidala ang suspek.
Mubalor ang tanang nasignit nga shabu ug kapin baynte gramos ang gibughaton o anaa sa kapin P350,000 ang kantidad.
Nasayrang una nang nalambigit sa kasong theft si alyas Bading nga nakulong ug nakagawas niadtiong Mayo ning kasamtangang tuig.
via || Bombo LJ Florendo
