DAVAO CITY – Nagpahigayon ug imbestigasyon ang Monkayo Muncipal Police atol sa nahitabong aksidente sa usa ka science class nga gikaangol sa tulo ka Grade 7 students sa Awao National High School, Barangay Awao, Monkayo, Davao de Oro.
Giila ang mga biktima nga sila Bemboy Montanez, Edwin Rebliza, ug Cyril Albeza, 12 hangtud 13 anyos ang pangidaron ug residente sa nahisgutang dapit.
Nasuta nga nagpahigayon ug science experment ang mga nahisgutang biktima.
Sa higayon nga gi-refill duol mismo sa stove sa Science teacher nga si Melvin Akiatan ang ethyl alcohol nga ilang gigamit sa lesson, misilaob kini nga miresulta sa ilabihang pagkapaso sa managlahing bahin sa lawas.
Miresponde dayon ang mga magtutudlo alang sa ilang atensyong medikal ug gipangdala ang mga biktima sa Davao De Oro Provincial Hospital sa Monkayo.
Nakagawas ang duha ka tumutuon sa ospital samtang gidala ang usa ka biktima sa Southern Philippine Medical Center alang sa tukmang pagpaayo.
via || Bombo LJ Florendo
