DAVAO CITY- Naugdaw ang usa ka panimalay human mabiyaan ang usa ka nagsigang kandila.
Matud pa sa saksi nga si Lewan Gallon, 37 anyos, silingan sa nanag-iya sa naugdaw nga panimalay nga samtang naglabay kini og basura, kalit lamang nga midilaab ang balay.
Sumala usab kang Fire Officer 1 Ivan Clint Otero, alas 6:15 ang takna sa kabuntagon nagsugod ang kalayo sa maong panimalay nga gipuy-an ni Elviro Masamayor, 63 anyos, kauban ang apo niini nga si Justine Gallon.
Ang maong balay gama sa light materials nga gipanag-iyahan ni Editha Masamayor nga anaa karon sa Cagayan nga igsoon usab ni Elviro.
Subay usab sa imbestigasyon sa otoridad, wala na matud pay kuryente ang tigbalay dugay na rason nga nagagamit sila og kandila ug nagakaon na lamang kini sa gawas sa ilang balay duol sa poste sa suga.
Aduna usab balay nga gitalang partially damaged nga gipanag-iyahan ni Eduardo Marcos. Samtang usa sab ang naangol sa maong insidente tungod nagdali-dali og panghipos sa iyang mga gamit.
Nagapangayo ang biktima karon og tabang tungod wala kini matulogan ug tapot lawas lamang ang nasalbar niini.
Gikompirma usab sa mga mirespondeng bombero nga alas 6:52 sa buntag under control na ang sunog ug alas 7:12 sa buntag sa dihang gideklara kining fire out.
